豆豆BLW滋味前奏《BLW簡介及必備用品》

到達加固既月份已有兩個月，豆豆由坐穩開始嘗試俾食物佢拎上手食，
而加8個多月，試既食物都愈來愈多。豆媽唔係以代到一餐為目標，
反而係想佢食得開心，足夠佢營養就足夠了！

BLW係咩？
BLW係Baby-led weaning既簡稱，中文通常係譯做嬰兒主導的斷奶方式。
係近呢幾年興起既加固其中一個方法，意思係BB做主導進食，想食幾多，食咩先都由BB話事。
食物唔需要全部都打蓉，只要將食物切成finger size，係大人指導之下自己餵食。

幾時可以開始BLW？
大約6個月，唔需要任何support下能夠自己坐穩達至十秒以上就可以了。

BLW係可唔可以食糊/粥仔呢？
可以的，只要係自己餵食都可以，BB比想像中叻，會識點運用吞同咬。
市面上有咬咬樂或者pre spoon，可以加入去比佢地自己拎住食。

BLW好物推介1：Nuby 咬咬樂 @Babies"R"Us有售

BLW好處與壞處？
好處：6個月開始BB對世界會好好奇，父母應該多鼓勵BB用手觸摸去探索世界，BLW除咗可以觸摸唔同身材係質感，仲能夠訓練小手肌肉，令手仔更靈活，對日後學習同自理能力都有幫助。
壞處：浪費食物及清潔時間

＊＊＊＊＊＊＊＊＊＊

決定BLW前要注意：
1，要識分咩係嗆同作嘔，只要BB坐直個人同埋食物正確大部份情況下都唔會嗆親。而作嘔係學習既過程一之，係身體防止嗆親既一種機制，BB反應會比大人敏感，如果執行者太驚慌會影響BLW效果。
2，唔好期望佢地會食到晒，因為BB初頭會拎身物黎玩，甚至掉晒落地。
3，要有耐性，預咗次次食完都要大清潔。
4，要在BB精神既狀態下進行BLW，食完BB想補奶就補奶，唔急代唔代到一餐。

如果你可以做到以上條件又想俾BB嘗試BLW既話，咁應該俾咩食物佢冇咁易嗆親？

初階食物：瓜菜類：菜心莖（唔要葉）西蘭花，豆角，節瓜，冬瓜，南瓜，紅蘿蔔，粟米仔生果：香蕉，牛油果，火龍果，西瓜，啤梨，蘋果（蒸至淋身）

以上既食物都係水份多、淋身、易楂上手，所以豆媽將佢歸類為初階食物。