Family & Home Ch.001 新屋裝修篇・特式牆

今次呢篇離一離題講下之前屋企裝修既野先！
第一次擁有自己既家當然想將全部自己鐘意既野放晒落去啦！

最開心既係，設計上既野，老公都係比我話事😆
入伙單位雖然唔係一手，但都唔舊，廚房同廁所都唔需要大執，

所以我地將重點放o係傢私同牆身上喇！


牆身方面，通常有三種選擇
1. 油漆
2. 牆紙
3. 特式牆（木工或水泥）

我地第一樣foul走既係牆紙⋯⋯因為香港既潮濕天氣會好易令牆身發霉，
過多幾年受潮後有機會有滲水或披口既情況，
所以我地最後決定屋企大部份位置都會上油漆，重點位置會做特式牆！

油漆
油漆最普遍都係乳膠漆。市面上林林種種，價錢亦都有平有貴，
亦都聲稱無甲醛、低VOC。所以最後問左師傅邊隻好，
佢推介本士呢兩個牌子：立邦、多樂士

兩個牌子質素差唔多，都係無味、可以用濕布清潔，所以我主力揀顏色。


多樂士樣版

最後決定左多樂士既lily white，揀好後就交比師傅買料、批灰、油油既工序喇！

雖然聲稱話無甲醛，但都怕會殘留有毒、有害物質，所以油完都要打開晒屋企既窗口吹下！
另外，推介你地買埋呢枝由中大出既「甲醛清」。
佢既成份係益生菌，冇化學成份，可以噴牆身同木製傢俱，噴完等佢自然風乾就得架喇！
所有新買既傢私我都有噴，雙重保障嘛！


甲醛清

特式牆
1. 白磚牆（文化石牆）
我一直都想整一幅白磚牆架喇，亦都叫文化石牆。
我鐘意佢夠簡約、襟睇、又有歐式既風格。
但其實最貴既唔係磚，而係師傳既手工，所以我唔可以咁貪心，只係做一個角落⋯
我揀左電視位置，咁就可以望返夠本啦！

白色磚我地o係旺角睇過幾次，都只係搵到最普通既款式，
所以我決定淘寶再搵下有冇特式小小既，最後比我搵到呢款！


Size：60x200mm (Image from taobao)

即刻訂左落黎，磚一到，我就即刻拼落牆望望效果，好滿意！
雖然運費仲貴過磚，但so far香港未見過，所以覺得好值！




裝修進行中 10%

**留意：磚與磚之間要有間距先至靚仔，師傅好醒目，用紅繩隔住，咁就行行都一樣啦！**
看似完成，但仲未。因為磚顏色偏灰，好似英泥粉咁，所以鋪完要油幾層白色油先搞掂！


裝修進行中 80%

2. 木牆
電視旁邊就係飯廳，想將佢地分返兩個區域，打算有格調小小，整木牆。
木牆係需要木工先砌木板，再用鋪地板既方式砌既，
因為我地最頂會做燈槽，所以水泥部份完成後，木工師傅可以開始起貨喇！


砌燈槽、起木板牆身

木板方面之前有考慮過用仿木紋既磁磚，但考慮到鋪磁磚上牆會令屋企溫度低左，
冇咁warm⋯所以最後決定揀複合地板！
我地睇中左德國牌子Parador既地板，板芯係最高密度既HDF，防潮防蟲。
呢個牌子既地板都幾多pattern選擇，下面呢款類似紅酒箱既木板，佢地一款入面有幾組，
唔怕pattern會係咁重覆，隨心咁鋪已經好靚呢！

最後我地揀左呢款

每晚放工，就算有幾累我地都會入去睇下裝修師傅既進度同有咩甩漏，
仲要決定木塊係打直鋪定打橫鋪，真係一絲不苟架，哈哈！

認真mode


完成喇！

擺埋傢私靚晒❤️
每樣野都係親手自己揀，都係我地既心血，所以特別親切，好有「家」既感覺！

留言

發佈留言