Be a mama Ch.007 奇妙一刻・胎動了 (19weeks1)

感受BB係子宮入面踢腳、轉動、跳躍、打嗝就係胎動，
好多第二胎既媽媽話胎動係整個孕期最令人懷念既感覺，所以要好好記住！

但每個媽媽體會胎動既時期都唔一樣，如果初期未感受到都唔駛太擔心。
一般18-22週先會開始。
醫學解釋話第二胎會早d feel到⋯可能係第一胎肚皮被撑薄左，
又或者係已經有經驗，所以易d 察覺個d 係胎動。

初期胎動：（18-24週）
好似蝴蝶拍翅膀咁。
但我就覺得似有條魚仔o係肚度游、跳、彈，拮拮下，甚至有觸電既感覺。
但肉眼見唔到肚皮有起伏，因為BB仲好細，唔夠力。
有時明明唔係肚餓，但肚會咕嚕咕嚕咁既聲。
胎動次數：小
胎動位置：肚池對落2-3cm、毛毛附近。


中期胎動：（18-29週）
開始有節奏感，唔駛刻意留意都感受到佢既蠕動，有機會發現BB打嗝。
BB打嗝係橫膈膜收縮引致，但亦唔影響佢既健康，隔一陣就會停止，唔駛擔心既！
胎動次數：頻繁，每次岩岩食完野，就會活躍d，踢得密好多，其次就係夜晚訓教前。
胎動位置：肚池對落2-3cm、毛毛附近。


後期胎動：（36週）
夜晚有機會比胎動整醒，之後越黎越大力，甚至痛，有媽媽話好似被人打咁！
胎動次數：8個月開始會減少（後期因為BB落左盆，BB活動空間細左）
胎動位置：如果BB頭轉向下既話，位置會係肚中間或者右邊助骨。

胎動其實都係BB既一種表達自己既方式～
佢地既郁動係發出訊息，等媽媽知道自己o係子宮內既狀況同安危架！

波浪蠕動＝心情好，舒服！
肚皮同時幾個地方突起＝伸懶腰
好有節奏＝打嗝
肚樣突然一邊突起，突然又另一邊突起＝翻身
突然大力踢＝被嚇到

幾時要數胎動次數？
到懷孕後期先需要數胎動次數的，一日內30下就表示係正常！
如果一日少過20下就有機會代表BB缺氧，要入醫院檢查。
＊連續性既胎動只計一次。＊

講返我懷孕初期，一開頭成日覺得肚皮好似有粒波子彈彈下經過，
有時個肚會咕嚕咕嚕咁既聲，當時認為係自己肚皮薄，
個肚彈彈下有D痕痕地，以為自己就黎爆紋⋯但諗諗下應係已經係胎動既開始喇！

到踏入19週，有日攤係梳化，突然見到個肚起伏左一下，
BB真真正正夠力踢到我肚皮郁喇！
個下真係好興奮，好想佢踢多一下，但當然係冇既😆
自從個一踢之後，就開始o係唔同既時間感受到佢既蠕動，
同網上講既一樣，真係夜晚同食野後會郁得多D呢！

題外話，除左胎動之外，原來25週起就可以o係肚皮上面聽到BB既心跳聲！
可以叫準爸爸貼近肚皮試下，BB心跳快過媽媽好多，係會分得出架！
胎動只有媽媽先感受到，就算爸爸放隻手係肚皮上都唔會感受到個種親密感，
所以我一定要好好記住！


My Page to follow | https://www.facebook.com/gogomanis/
Esdlife Blog | http://wow.esdlife.com/space.php?uid=87788