豆豆成長紀錄 Ch.007 13-14m 寶寶你懂嗎？

踏入一歲後，大家對豆豆既期望都高咗，的確自己都會有呢種心態，
好似過咗一歲就係大個女既指標，「聽得明，行得好，識講野」都應該的，
開始識睇人眉頭眼額，但其實豆都係一知半解，好多野都係學習當中。

有一日豆訓前自己開窗簾望風景
  • 懂得表達自己意願
豆豆仲未識講野表達自己，但佢識點頭同搖頭去表達yes or no，好似飲水時會問佢要唔要，佢唔飲會搖頭，又例如食緊鐘意既野時會點頭。

 呢點證明佢擁有愈黎愈多自己既思想同意願，愈黎愈有性格！
心情好叫佢做咩動作都肯～
  • 搗蛋王
無論出街或者係屋企，豆都係會搞亂檔，出街會將人地既貨搬黎搬去，屋企就整到成地都係玩具⋯⋯見到佢咁活潑好動其實好開心，但另一方面就好苦惱，唔知點去教佢執好玩具同唔好影響人地舖頭運作⋯

  • 跌碰小不免，家長要學習放下
抬頭、轉身、爬行、坐、企、行、跑都係成長必經階段。


識行之後成日都唔駛人拖住，係街上亂咁走，跌親個個人都唔想，第一唔好俾身邊人有壓力，覺得照顧不周先令佢受傷，第二要知道小朋友跌跌碰碰小不免，一定會面對受傷過程，唔好過份緊張，皮外傷一定會好返既！

大家又有冇諗過小朋友整親應該用咩態度去面對呢？

我覺得有三類人： 
1. 呵返錫返抱返 
2. 邊到整親佢就打邊度無數 
3. 故勵小朋友唔再喊，下次如何避免再整親

我最唔想見到就係「2」，今次可能係張台角整親，下次可能係小朋友撞到佢，咁係咪要打返小朋友無數呢？

 我會先做「3」，適當時做「1」，呵返唔係憐憫佢地，係想佢地感受到媽咪重視同擔心，受傷媽咪都一樣痛。

撞親豆媽會先睇豆反應，有時腫成咁都唔會喊，我都冇哄佢。
  • 食固情況
都係維持三餐，早餐有時會有粥、生果或者麵包。豆學緊用餐具，自己用匙羹舀到會咪咪咀笑。午餐同晚餐大致同以前一樣，中間會有零食同生果提供，兩餐牛奶，一餐奶粉！
  • 自己病了，是擔心傳染給小朋友
豆豆打一歲針個兩星期，豆媽日日都有同佢度體溫，最後係冇發燒，超叻叻！

 但兩星期後豆媽感冒⋯次次病最怕都唔係自己會幾辛苦，係怕會傳染俾小朋友，返屋企帶口罩，食飯用公筷等等，但最後都係傳咗俾佢，最後都係要發燒⋯一發燒同咳，最唔想既事情就會發生，就係嘔😢
剛巧要去旅行，幸好上機前一日退咗燒
  • 再見電子產品
媽媽袋入面一定會帶一本書，出街搭車時解悶，我發現長輩俾電子產品哄佢既機率都算高，所以同我一齊時我都要佢遠離電子產品。

搭地鐵可以坐定定睇一陣書
  • 所有爸媽都係長氣王？
「唔准。。。。唔好。。。。唔得。。。。」
呢三個NO係經常掛係口邊，有時仲會好勞氣，同一樣野重覆好多次，有時都覺得自己好長氣呢！

 豆媽自己都學習緊用正面方向教導佢，唔好成日nonono。


  • 其實快樂很簡單
只要帶佢去遊樂場、公園玩，或者俾機會佢接觸新事物就好開心，BB就係要呢種生活，醒咗就玩，累就訓覺，肚餓就食野。

一歲一個月時帶豆豆去大阪放眼世界。今次旅行去睇好多動物同海洋生物，唔理佢大個仲記唔記得，我只係知佢學識咗好多動物，見到所有動物都好好奇，好有反應，呢個反應已經值得了！
海游館

摸天竺鼠

希望大家鐘意我既分享，下次再見啦！
IG | be.manis
BE Certified Blogger | BE.MANIS


如有任何活動邀請或試用，可以聯絡我：mannis.chan@yahoo.com.hk

留言

發佈留言