豆媽媽日誌 Ch.004 舒緩塞奶天然5招療法

餵母乳可以同BB更親密，但每次塞奶都會好辛苦同沮喪⋯
由豆豆出世一直都係餵母乳，我已經遇過幾次塞奶喇，仲試過乳線炎發燒呢！

 點解會塞奶？
乳房主要係由兩種組織所組成，就係乳腺同脂肪組織。乳線由15-20個小葉同乳管構成，
小葉既末端有腺泡負責分泌乳汁，乳汁經由乳管傳送到乳頭。



塞奶大多數係因為太耐冇泵奶或乳管被脂肪組織（乳頭會出現白點）凝結成乳塊，
令乳線阻塞變石頭胸，青筋胸，好硬，模上去一舊舊咁。
當嚴重塞奶時，乳汁既水分、糖分、蛋白質即成為細菌既溫床，就會誘發乳腺炎⋯

 身體會沾寒沾凍、發冷、甚至發燒、全身酸痛，令到你好冇心機，
連抱BB埋心口都會忍忍作痛⋯

經過我幾次塞奶，由地獄返返上天堂後，都有小小心得分享下，希望幫到塞奶既媽媽⋯

 舒緩塞奶天然5招療法

 1. 持續餵哺

BB係我最好既「通乳師」，記住，就算塞奶都要堅持餵哺，幾痛都會捱過的！
BB比泵奶器啜得更清，將硬既位置對住BB下巴比佢啜（就算未到食奶時間都俾佢啜）
每啜一次都會鬆返小小，下巴對邊到就幫你通邊到，BB唔肯啜既話就要泵出黎。
當然冇可能一次就會好返，塞奶最小都要1-2日先會鬆得返喇！


 2. 適當按摩
當發現塞奶未係好嚴重既時候，就要用手推，由硬塊方向推出乳頭位置，
要輕輕力，過份用力按壓只會加劇痛楚令乳房組織受傷。
有心機既話就加按摩油推，效果會更好⋯


 3. 沖熱水涼

好多人話塞就要熱敷、凍敷，我覺得效果麻麻地，我寧願去沖個熱水涼，
因為塞奶會沾寒沾凍，明明唔凍都無端端會起雞皮，沖涼絕對舒緩到暫時既痛楚。
同埋要一路沖一路按，嘗試C字手擠奶，如果你成功通到既話，D奶會水柱咁湧出黎！

4. 多飲水，避免多油高脂食物

母乳係由95%水同5%既蛋白質組成， 想多奶而又唔塞奶既，
記住三個要訣：多埋身、多飲湯水、保持清淡飲食，向炸雞、薯條say no!😭
-->

我坐月時飲既發奶湯水Top3：
花生豬腳湯、蓮藕黑豆章魚湯，木瓜鯽魚/排骨湯
＊＊塞奶時可以加通草通乳＊＊
全日：飲1-2L炒米茶或水
早上：一杯熱鮮奶，唔夠精神會飲滴雞精補充體力
出街：水、豆漿、珍珠奶茶、杏仁霜


炒米茶自己袋定一包包，用憫燒杯焗好正，
個樽夠闊易放茶包、容量大唔駛成日沖，仲好保溫。

 5. 休息

休息係必需必需必需的！
我試過塞奶要訓足一日，BB訓你就要訓，基本上餵完，訓。餵完，訓。

－－－－－－－－
塞奶雖然係好辛苦，但餵奶既親子時刻比起個幾日既痛苦只係微不足道既過程，
塞完又係一條好漢，一樣可以餵到豆豆肥肥白白！



希望大家鐘意我既分享，我facebook page不定期更新豆豆成長，下次再見啦！ 


留言

發佈留言