豆豆成長紀錄 Ch.001 1-2m

做左媽咪兩個月，只係短短既兩個月我已經由乜都唔識到慢慢自己邊學邊做，
今日就黎個盤點講下當媽後既不同啦⋯

1. 購物變得有攻略
以前冇目的都可以行足一日，鐘意就行下家品、睇下衫，坐低飲下野又得。

而加行街要走馬看花，買野要好有目標，行完一圈就要快D走，
帶BB車行商場好阻定，上落又要搵𨋢，怕煩唔搵𨋢用電梯就要舉重扶住BB車，
帶住佢幾個鐘已經可以好累。

2. 作息時間大轉變
以前半夜2、3點先訓係閒事，上床前仲要玩一輪電話先肯訓教，
一訓就訓到天光，踢都唔郁。冬天一定會賴床，屋企一定係最遲一個起身～

而加覺得十點已經好夜，哄掂BB訓著先敢自己上床訓，半夜由暖粒粒既床舖爬起身餵奶，
餵完哄完BB後床舖已經變得凍冰冰，捱到眼都腫埋但從無投訴，
見到BB訓得安穩已經好滿足！


3.痛在你身，痛在我心 
BB打針時要捉住佢對大肶，望住佢被桔就大喊，感覺係痛過桔落自己度，心都酸呢！
4.大力士

出街除左帶一大袋BB用品外，仲要揹住BB，但幾重都好想揹住佢，有人幫都話唔駛，
因為係自己好想揹佢、照顧佢、望住佢，簡直係大力士上身。


5. BB是香的
覺得BB味好香，由其係手仔、臉仔，係咁索索索。人地話係奶蘇味，但我話係奶香味～😂
仲會用個鼻索下patpat位聞下BB有冇便便，有味就話「係呀，係柯左呀」，
咁索法完全唔覺臭？


6. 相機爆棚
以前電話相簿都係自己既相，而加全部都係BB相，就算o係同一個位、同一個樣都可以影十張以上，短短一個月內既電話容量已經係以前既一年。


7. 口不對心的BB話專員
而加講野特別溫柔，對住BB話「扭計唔錫喇！」，但轉頭又偷偷向佢索吻。
BB輕輕笑一笑，係咁同身邊人講「笑喇笑喇，你睇！」其實自己最窩心。
成日同BB講疊字，「飲奶奶」「換片片」「做乜扭扭扭，扭計仔」自己聽返都毛管戙。


8. 不顧形象
自己一個湊BB冇人幫手既時候可以用半個鐘化妝已經好好架喇！
有時淨係打算帶佢去打針就不顧形象，頭都唔梳就出街，旁若無人。
一邊抱一邊同BB傾計，路人以為我係傻的。


9. 分享症
以前instagram成個月都未必更新一次，而加成日玩live photo，
每次upload既都係BB，甚至代入BB角色幫佢發言。



呢小小改變都係幸福既證據，我願意為BB改變，變做一個更好既媽咪。
呢兩個月既full time mother已經完結，唔知復工後既路係點，BB會唔會冇咁痴我呢⋯

希望大家鐘意我既分享，我facebook page不定期更新豆豆成長，下次再見啦！
產品試用歡迎聯絡豆媽架，Ciao～

Instagram | be.manis 多多留腳印支持啦!!
如有任何活動邀請或試用，可以聯絡我：mannis.chan@yahoo.com.hk

留言

發佈留言