Be a mama Ch.017 荃灣港安生產紀錄 (39weeks)

由於好多媽媽話第一胎好大機會會過期居留，
就算作動後都要痛十幾個鐘先生得出，所以37週後足月後，已經唔係早產兒可以隨時出世，
38週放埋產假更加用盡所有方法引佢出黎，好似：

- 砌好BB床（迷信野話砌左BB就會出黎喎？）
- 飯後行30分鐘
- 訓前30下深蹲

飲食方面，我每日都揀一樣糖水黎清胎毒：

- 臭草綠豆沙
- 腐竹糖水
- 龜靈膏
- 芝麻糊
- 椰青水
**出面買既糖水比較甜，我鐘意自己煲，可以控制甜度。**

**產前紀錄**

37週6・12月8日・倒數10天

產假我冇偷懶架，成個孕期我都有洗衫、熨衫、煮飯，
今晚個肚又好似大左，不過都係38吋，感覺陀得低左小小。

39週0・12月16日・倒數2天

今朝右邊肚陰陰痛，成日諗如果真係陣痛自己頂唔頂得順架？
我一話痛，老公就會笑咪咪問：「豆豆，你係咪要出黎喇？」
我痛佢就表示興奮囉，變態！😂

39週2・12月17日・倒數1天

今日屋企提早做冬，好多親戚都話我精神，唔似有左，個肚唔突😅
乜大肚比人既印象真係要口腫面腫先得？

**生產紀錄**

39週2・12月18日6點・倒數0天5小時

夜晚發夢自己見紅，紮醒左諗住去個廁所再大覺訓⋯
點知一抺～有粉紅分泌！我真係見紅！！
即時大叫：「我。見。紅。呀！😱😱」
但我見未有肚痛，叫老公唔駛理我訓下先，我就慢慢執埋個走佬袋喇！

一個鐘後開始有小小M痛既感覺，但唔強烈既，諗住淡淡定上返床訓多陣⋯
但一上床都係驚驚青怕自己會穿水，所以打比主診醫生，點知佢叫我即刻入院⋯

入院前各媽媽都叮囑要去沖涼先，所以我享受埋最後一次既淋浴先出門口，
個日起就正式同生水暫別⋯

12月18日7時30・倒數0天3.5小時

沖完涼執好野就出發去醫院，好彩我係朝早見紅，老公仲未返工可以楂車車我去醫院，
比我相像要自己call車入院感覺好好多！
坐車期間隔幾分鐘個肚就痛一次，程車同老公有講有笑，仲對錶再加十幾粒鐘，
睇下BB係咪一定今日內一定會出到世。

因為我陣痛仲係好初期，所以我係施施然做入院手續同入產房既，
入產房前，姑娘會問：

- 產後入住邊類房間（如果醫院有空位可以免費upgrade）
- 爸爸會否陪產、剪臍帶、袋鼠抱
- BB出世後補唔補奶粉，補既話揀邊隻牌子
- 聽力測試（健康院有得免費做，唔駛o係私家做都得）

12月18日8時50・倒數0天2小時


揀好晒後就入產房脫光光換紫色睡衣，姑娘好快手幫我係手種左枝管抽血、
仲駁左部機mon住BB心跳同陣痛，搞掂之後就幫我檢查埋開左幾多度，
佢話暫時只係1度，係好初期，仲有排架，不過BB個頭好低，叫我放心，應該好易生。

我見姑娘話有排先生得，我怕自己晏D冇力生，就要求可唔可以食份早餐先，
姑娘話可以但要快，因為醫生黎左之後就可能唔比我食野架喇！

12月18日9時22・倒數0天1.5小時

老公叫左個外賣比我食，係煎蛋火腿通粉加阿華田，
係呢個時候陣痛明顯強左，姑娘入黎望我個陣話我而加陣痛有4-5級左右。
痛既時候就要用口呼吸舒緩，一停就即刻快快咁食。
個刻覺得發生既野過得好快，各人都來去匆匆咁，好忙、好趕⋯

12月18日9時46・倒數0天1小時


9點幾醫生黎睇我喇，佢望完個mon話情況麻麻地，BB心跳差左小小😰
我一陣痛BB心跳就跌一跌，醫生話我而加只係開左2度BB都跌到咁會有小小危險，
所以提議幫我人工穿水再落催生藥加快產程。

我好怕催生，但個刻都要頂硬上話好架啦！
一穿水我就感覺到有一鼓好暖既水o係下面流出黎，雖然係有床墊墊住，
但我覺得流到成張床都係，頓時覺得自己好污糟⋯⋯
穿完水未落催生藥發現BB心跳又drop左，姑娘有小小緊張，叫醫生再黎睇我。

醫生望完之後話「你身體係可以順產，但BB而加唔樂觀，唔好咁博喇，最好係開刀⋯」

😢😢😢😢

聽到醫生咁講好唔開心，我竟然唔可以順產生佢出黎😭 
我每日既深蹲、我每日既行30分鐘冇用喇！
醫生比我地考慮左幾分鐘，期間我望住老公扁晒咀乜都講唔出，
但都係覺得個刻要聽醫生講開刀啦⋯

12月18日10時30・倒數0天0.5小時

同意緊急開刀後，各單位又好快咁將我推入𨋢上手術室，
同一時間係咁拎文件比我簽⋯個刻好似電視劇一樣，
過左手術床後，因為我已經穿左水又有陣痛（並非預約開刀冇陣痛咁舒服），
有時胎水又會自己流出黎，感覺真係好難受⋯

成個過程都係打晒冷震⋯我要將自己卷成蝦米狀比麻醉師落藥，
個刻覺得自己好可憐，係咁比人舞黎舞去，一陣仲要捱一刀😢

打完麻醉藥就要訓返平個人，我下半身亦都慢慢失去知覺。
可能係半身麻醉，我雙手要比野綁住架⋯
打完麻醉針佢地先比我老公入手術室陪產，打針既慘豬過程佢冇見到，
見到佢之後我就忍唔住眼角流淚⋯但同一時間，手術已經開始了⋯

開始既時候肚會卑卑地，唔會覺得痛但知道佢做緊咩，有拉扯感覺。
經過幾分鐘既拉拉扯扯，各手術人員都恭喜我地，
BB出世喇，聽到BB喊聲，好大聲呢！

「而加係幾多點，比你望下BB，爸爸睇下係女仔定男仔？」
「女仔！」

雖然生產過程有d驚險，同我相像有出入，不過最緊要係母囡平安，
可以鬆一口氣喇，好感恩呢💕

因為我仲要訓係度聯針，冇得抱BB，由老公抱住BB比我望左幾眼，
影左幾張相姑娘就抱走BB同爸爸去剪臍帶，個陣得返我係手術室，冇得同BB身連心喇！


聯針聯左半個鐘左右，比我相像中耐，原來醫生係逐層逐層聯，總共聯左七層😱
聯完之後仲未上得房住，要係出面量幾次血壓，正常先可以上病房。


接住BB就要訓暖箱，夠暖就即刻推BB入房比我埋身試餵BB。
望住佢覺得好奇妙，乜原來我陀住一舊咁大份既野架？😳
不過BB算係細碼，我相信出世後會慢慢追返，一樣會肥肥白白既！


所有媽媽都覺得自己仔囡最可愛，由其佢食完奶唔喊冇扭計既樣最得人鐘意😌

**休養紀錄**

12月19日・產後第2天


因為麻醉藥要3-4個鐘先退，係唔可以落唔到床的，所以前一晚都係插靠尿喉同營養液⋯
今朝早拆喉解放，可以試落地喇！

今日醫院亦安排左攝影師黎幫所有出左世既BB同親人合照，我啦啦臨起身梳洗，
點知隔左一陣就作嘔見暈⋯影到尾聲仲要姑娘用輪椅推返入房，又喊，無鬼用呢！🤦🏻‍♀️


今日亦都係我第一晚通宵餵奶，港安所有姑娘都好好，由其係o係餵哺室教我既姑娘！
因為我堅持唔補奶粉，初生BB兩個鐘就要餵一次，
10點後姑娘唔會推BB入病房，所以要餵就自己爬起身入餵哺室餵BB。

不過我覺得身體許可既話入去餵絕對比起o係病床餵好，
一黎可以專心D，二黎可以學多D餵哺姿勢。
有咩問題可以即時禁鐘仔叫姑娘幫手，o係入面我真係學到野架！

餵哺室地方好舒服，仲有餵奶枕用

可能我係開刀既關係，第二日未正式上奶，呢2日都係比BB試下啜既感覺，
就算BB頭2日食唔到都冇問題架，因為BB出世有足夠既儲備，
加上個胃好似波子咁細，唔會餓親佢既！


呢晚深夜得我一個媽媽餵奶咋，唔通其他媽媽夜晚都係補奶粉既？
因為得我一個人既關系，所以我擁有私人姑娘教我用攬球式餵奶🤞🏻
經過呢一晚，我好似熟手左好多咁😛

12月20日・產後第3天

手術後第2日只係食左粥水，可以自行柯尿就可以食返正常野架喇！
不過唔知係咪開刀個肚入左好多風，夜晚個肚係咁嘰哩咕嚕咁叫，好唔舒服⋯
訓教個陣隻手仲會卑醒，醫生話正常，係主婦手喎，下，咁快？
定係麻醉藥既副作用？定我唔小心用左生水洗手呢？

順帶一堤，o係港安分娩係包埋產後護理套裝、日常用品套裝同BB出院小禮物！
雖然開刀比順產既惡露小好多，但我每次去廁所都要換衛生巾⋯
一開頭姑娘仲幫我打孖貼2條，貼到上patpat後面🤦🏻‍♀️
所以唔係幾夠用，隨後幾日我就用返自己帶去既M巾換。


產後護理套裝包括：
產婦衛生巾、床墊、適意墊、生理沖洗器、網褲 


日常用品套裝包括：
牙刷、牙膏、梳子、牙線、毛巾、杯、掛袋、眼罩、沐浴露、洗頭水、棉花棒、浴帽、橡筋

連掛袋都有，好貼心


12月21日・產後第4天

餵人奶BB既黃疸會退得慢好多架，今日兒科醫生話BB雖然體重升返小小，
但黃疸指數有209，岩岩高過標準值，所以要全日照燈，確保聽日可以同我一齊出院。

今日都開始上奶喇，叫左老公帶奶樽比我試下吱出黎，終於明白咩係滴滴皆辛苦！
用左10分鐘先滴到10ml，初乳係特別珍貴既，自己吱完可以交比姑娘比佢地夜晚代餵架！


12月22日・產後第5天

返屋企喇！返屋企喇！
今朝兒科醫生一早黎巡房報告話BB既黃疸已經退得7788喇，可以出院！

出院前姑娘比返晒BB針卡、相簿、睇黃疸既覆診期同兩枝配方水奶我～
姑娘話雖然冇睇過我餵成點，但睇返紀錄，我次次餵完BB都冇乜扭計，又有足夠既濕片，
證明我餵得好，有信心我同BB夾到可以餵全人奶！
佢咁講直頭係幫我打左枝強心針，信心返晒黎呀！😆

最後我想講雖然最後要緊急開刀，但我冇後悔選擇順產，因為BB係自己選擇呢一日出世既！
亦好感恩開刀後康復得比我如期快，見住個肚腩愈黎愈細好興奮，
去洗傷口個陣，姑娘話因為我餵人奶，子宮會收得快好多，餵人奶真係好多好處，
係小左時間訓啫，頂到既，為母則強嘛😎💪🏻

產後大部份時間用黎休養同照顧BB，不過facebook都會keep住紀錄BB成長架！
希望大家鐘意我既分享，歡迎like我既facebook page，下次再見！ Ciao～

 My Page to follow | https://www.facebook.com/gogomanis/

留言

發佈留言